يوميات شاب سعودي مطنش وسعيد
--------------------------------------------------------------------------------
الرجاء من الإخوة والإخوات
خلع الأحذية عند الدخول
علشان الفرشة جديده
*الساعة السابعة صباحا من يوم السبت يصحى من النوم على صوت زقـزقـة العصافير ,
وأصوات الـحـفـارات والدركترات اللي تحفر بالشارع الخلفي (شكرا لرئيس البلدية الجديد).
يقوم من فراشه مملوءا بالحيوية يروح إلى ستائر الغرفة ويسكرها زين ويرجع لفراشه يكمل نومته ,,
دقائق وتجي أمه تطق عليه الباب:أنت ماصحيت إلى الحين,,,,
مطنش يقول:لا لا صحيت بس شوي بارتاح.
أمه:ترتاح من إيش !! قم يابوي لا تأخر على الجامعة.
مطنش :سمي سمي.
بفضل الله يقوم المطنش خاصة أنه {مشتاق} للجامعة من زماااااااان عنها .
يرووح بسرعة للمغسلة يرشق وجهه بالماء وبعدين يرووح بسرعة إلى راس أمه يمطخه(يبوسه).
طبعاً؛أمه جالسة بالصالة قدام التلفزيون تتابع سوق الأسهم,,,على فكرة أمه {هاموره} من هوامير الأسهم تبيع وتشري,
المهم حب راسها وصباح الخير يمه وصباح القشطة صباح الزبادي قليل الدسم (علشان الرجيم ما يخرب),,,
تقوله أمه:شف جهزت لك كوب قهوه خذه معك بالطريق,,,,,مطنش:الله يخليتس لي يا عين جدي.
مطنش يطلع من البيت يركب سيارته وينطلق في شوراع المدينة في هذا الصباح الرائع,
وشعاره’ طنش تعش تنتعش,,,ويا هلا بالطش والرش>>>>وش دخلها ذي,بالله طنشوها.
يذهب للجامعة وقد قام بتدوير المسجل على صوت فيروز الملائكي(مطنش بس مزاااج).
المهم يتجه للجامعة وشكله بيضيع طريقها من كثر مايروح لها.
وقبل ما يوصل للجامعة يوقفه شرطي المرور عند تفتيش
ويقول بفصاحته المعهوده:{إثباتك} ,,,,مطنش:ماهيب معي
الشرطي :الرخصة
مطنش: ماهيب معي بعد
الشرطي:الإستمارة
مطنش:ماهيب معي بعد
يناظر فيه الشرطي ويقول:رح رح الله يستر عليك.
المهم أنه يوصل إلى الجامعة,
ينزل من السيارة {حافي القدمين} قصدي {خالي الوفاض}
يعني لا كتاب ولا مذكرة وهلم جرة.... وهلم جرتين....
يحضر له محاضرتين قال الدكتور للطلاب:أنا عايز أنبهكوا أنو عندكو اختبار يوم السلاساء بإزن الله.
بالمحاظرة الثانية مطنش (طق جوله) يعني زهق ووده يطلع,,,,وش الحل؟
فأول ما أخذ الدكتور الحضور وإلتفت للسبورة يبي يكتب, فخت(هج) المطنش مع الباب الخلفي للقاعة
ومن باب القاعة إلى باب الجامعة ومن باب الجامعة إلى باب السيارة
ومن باب السيارة إلى باب {المطعم} أخذ له مثلوثة ومن باب المطعم إلى {صالة بيتهم},
تغدا قبل الظهر من التعب والإرهاق عقب المحاضرتين العظيمتين,
هو بدأ بالغدا قبل ما يأذن الظهر وانتهى من الغدا والناس يطلعون من المسجد,
ابن الحلال صلى بيتهم ما قصر(الله يهديه حتى المسجد ما سلم من التطنيش)
ونام {القيلولة}
أذن العصر نام {الفيلولة}
أذن المغرب ونام {{الليلولة}}.
قام وهو يأذن العشاء يحسبه الفجر,
ما يدري شئ عن الدنيا,آخر شئ يذكره {دجاجة و رز وكاس لبن},
المهم قام وجهه متنفخ من كثر النوم طلع من غرفته ولا كل الدنيا ظلام مافيه أحد نزل للدور اللي تحت.
لقى بغرفة الأكل مراسم احتفال بالونات كيكة وشراب احمم (ببسي وسفن خالي من الكحول ),,,
راح للمطبخ لقى أهله قاعدين يجهزون للحفلة,,,,
قالهم وش عندكم,أخته الصغيرة :أبوي مسوي لي حفلة علشاني أخذت الأولى على الفصل.
مطنش يروح بدون ما أحد يدري (ناوي شر بالكيكة) ويقطع له قطعة من الكيكة ويصب له ببسي ويدق على أخوياه
وينكم فيه ,بالإستراحة,,,أجل جايكم الحين اصبروا لي على العشاء
يروح للإستراحة ويجلس هناك إلى الفجر بين لعب بلوت و كرة طائرة .....
يرجع إلى بيتهم مع خيوط الفجر الأولى.
يوم الأحد---
الساعة السابعة:نايم
الساعة الثامنة:نايم
الساعة التاسعة:نايم
الساعة العاشرة:نايم ويحلم
الساعة 11:خلص الحلم بس نايم
الساعة 12:نايم
الساعة الواحدة:نايم
الساعة الواحدة وربع:قام قام إبشروا
قام وصلى وتغدا وعليه بالعافية
في وقت المغرب قام المطنش بعمل خيري (قل أن يجود الزمان بمثله )
راح يودي أمه وخواته إلى بيت خالته يوم وصل البيت الخالة
قالت له أمه:تعالنا الساعة 12 لا تتأخر علينا.
مطنش:يصير خير
مطنش يشوف ولد خالته طالع من بيتهم ويجي يسلم عليه.
يقول ولد خالته: طالع للبر (نبي نودع البر قبل الصيف)أبطلع أنا وفلان وفلان وفلان تعرفهم ولا؟
مطنش:أفا عليك,,, أجل تراني خويك
ولد خالته :ترا بنتأخر على أهلك
مطنش:ماعليك يا رجال أنا أسنعهم
مطنش يروح مع ولد خالته للبر >>طق وطيران وطبول وسامري وهجيني ويسحب على أهله
يوم قربت الساعة تصير 12 مطنش مقفل جواله,
رجع للبيت الساعة 2 لقى أهله موجودين نايمين
قال:الله يسلم التكاسي(منطش نذل)
الساعة السابعة يوم الأثنين,,يروح للجامعة يجلس بالمطعم يروق المزاج لمدة ثلاث ساعات
الساعة 11:يتجه إلى القاعة علشان يحضر محاضرة
يدخل القاعة يجلس
يلقى الدكتور يصارخ:إذا بتريدو أي ورقي أو مذكري حيا الله شي, بدي ياكن تظهروه لبرى القاعة.
إلتفت على اللي جنبه قال :الإختبار موب بكره
قال:اليوم فيه اختبار وبكرة فيه اختبار
قال مطنش :أوف وأنا ما دريت ,,,,الله لايهينك معك قلم زيادة
يأخذ من اللي جنبه قلم ويحل فيه الإختبار وعلى باب الله أنواع الخرابيط
وبعد كذا يطلع من الجامعة ويروح لمطعم يدلع نفسه بعد الإختبار
وعلى هالطريقة تستمر حياة أخوكم في الله مليئة بالطناشة والوناسة
المطنش وإشارات المرور
إذا وقف عند أحد إشارات المرور يلتفت يمينا وشمالا
إذا ما فيه دوريات دعس ومشى
وإذا فيه دوريات فإن إشارة المرور من أهم قواعد السلامة ويجب الحفاظ عليه.
وأحد المرات قطع الإشارة بدون مايتلفت لا يمين ولا يسار
وإلا الدوريات وراه يوقفه وينزل يقوله :ماشاء الله يالحبيب ليش قطعت الإشارة.
قال مطنش:تبي الصراحة قطعتها لأني ما شفتك.
طخخخ ورقة صفراء (مخالفة)
وحزام الأمان يربطه قبل مايركب ويجلس عليه
علشان أولا: مايتعفط الثوب. ثانيا: وصوت المنبه حق الحزام يسكت
نتكفي بهذا القدر من المذكرات الخاصة الفاضحة لمطنش لأني تعبت من الكتابة
لكن أحب اختم كلامي بأن التطنيش دواء فعال ينصح به الأطباء إلى كل من هو شايل
هم ثقب الأوزون
وهم تلوث البيئة
وهم نفوق الدلافين والحيتان
وهم نفاد مخزون النفط في السعودية
وهم انتشار البعراين السائبة في الطرق السريعة
وهم كثرة الذباب في المانطق الإستوائية
انصحك بالتطنيش
اللي شايل هموم العالم على راسه
طنش ووسع صدرك لا تروح حياتك غرابيل
عليك بالتطنيش
طنش تعش
وعلى فكرة>>>>>>>>>v
<<<<<<<<<<<<<<<<
v
v
من شال الأرض وطته
ومن وطى الأرض تشيله
الأربعاء أبريل 09, 2008 11:46 am
